蜂蜜梅子酒

上年因為睇左肥丁既網頁，

學識左整梅子酒。

釀了七個月的蜂蜜梅子酒，

今日因為我想要個玻璃樽，

俾我開左封喇哈哈！

我用左 1:1 既凍水黎開黎飲，

仍然係好香既梅子味，

只係有少少既酒精味，O岩晒我！

下面張相就係當初啱啱釀既樣，

釀下釀下 D 梅子就會自己出水架喇～

但係其實每樽到最後都只係得少於半樽既收成。

下年可以釀多少少喇！

洛神花果醬

媽媽種了靚靚的洛神花，

專登留左 d 俾我要黎整洛神花果醬，

仲要連材料都準備好晒！

當然要即刻試整啦～

整完真係覺得好簡單，

最重要又好食喎，哈哈！

其實我好鐘意洛神花沖水既味，

酸酸地咁，好開胃～

試整之前，睇下洛神花既真身有幾靚啦！

但係當佢地跌左落地下，就變左咁...

打開好樣衰既殘花，就會有呢粒洛神花喇。

新鮮o個陣隻色紅 d 架！

放得耐左就越黎越深紅。

材料：

洛神花適量（呢度有 33 粒）

片糖適量（呢度有 100g）

（媽媽說片糖比白糖健康，否則用黃糖也可）

已消毒的玻璃樽仔

步驟：

1. 整碎片糖（用較剪剪就得喇）

2. 將洛神花既核拎出黎，先將佢既底切左

3. 然後就可以用筷子推中間粒核出黎
　（其實可以就咁 meet 開 d 花瓣，
　　但我見佢咁靚唔捨得咁快 meet 爛佢）

4. d 核好似有粒花咁大咁，
　咁就冇用好似好浪費咁

5. 洗乾淨

6. 剪碎

7. 加半碗水，用慢火慢慢煮，一路煮要一路攪，
　等佢唔好痴底

8. 佢會越黎越杰的，因為洛神花有天然既果膠，

　所以唔駛加其他果膠都整到果醬。

　見到佢杰身左就可以落埋 d 片糖，

　一路繼續攪等佢溶。

    

9. 入樽，搞掂！

薄底PIZZA

基本上，今次 pizza 既做法係完全採用肥丁既食譜。

都係o個句啦，難既野我唔整的。

就係佢個食譜o個句話「無需等發酵」吸引左我。

加上我又有個 LC 22cm buffet 可以放到入爐，

所以更加要試下啦！

材料：

麵糰（麵糰食譜同「肥丁」的完全冇分別）

高筋麵粉 250g、酵母 5g、鹽 3g、糖 7g、

橄欖油 1湯匙（明顯我係冇橄欖油既，所以我用左普通粟米油）

暖水 140g（肥丁話約 40 度，我就大概覺得隻手指放到落水既暖度就算喇）

餡料：

白磨菇半隻、啡磨菇半隻、蕃茄仔五粒、
香草腸一條、莎樂美腸四小片、黃椒 1/3 個
蕃茄醬適量、Mozzarella cheese 一舊、Parmesan cheese 適量

步驟：

1. 準備好各餡料

2. 切好，並用廚房紙巾吸乾水
　（肥丁話如果唔夠乾，焗出黎就冇咁脆喇）

3. 準備暖水，將糖同酵母放落暖水攪勻

4. 跟住再放麵粉、鹽同油，先攪攪後搓搓

5. 搓到光滑靚靚

6. 分三份，每次煮一個 pizza 要一份就夠喇。
　另外兩份可以包好放雪櫃，肥丁話可以保存一個月。

7. 預熱焗爐 240 度。
　碌好餅底，鍋底掃油，放落去，整形

8. 塗上蕃茄醬

9. 隨心加上材料

10. Mozzarella 芝士切薄片，舖上；
　  之後再灑上 Parmesan cheese。

11. 放入焗爐，焗 6 分鐘就食得喇！

其實到最後焗出黎，冇想像中咁脆。
可能因為我整得唔夠薄，
同埋蕃茄醬比較濕（我冇慢火炒佢令佢乾 d 水）。
不過反而有少少厚批既質感，都唔錯。
見佢網頁話有網友試過用呢個食譜，
發酵一個鐘後再整厚批同芝心批都得，
又等我下次試下先！

熱香餅

其實只係好想試下坊間既預拌粉，

睇下整出黎好唔好味，似唔似麥當當o個 d 咁。

整完其實隻味好 okay 架（乜預伴粉會唔 okay 架咩XD），

不過個賣相樣衰 d 之嘛哈哈！

今次o係 Wellcome 買左呢隻，$28左右。

一盒原來有兩包粉，我只係用左半包，
原食譜一包落 250 ml 水，我個量杯仔而家係 120 ml。
除左加水，冇野要再加喇！
連蛋呀奶呀都唔駛，o岩晒我呢 d 懶人。

原食譜話要用打蛋器打到幼滑。

我心諗，不是吧，食幾件熱香餅要開打蛋器？

所以我只係用盡量撈勻，其實都好幼滑丫！

跟住預熱煎 pan，加少少油，就可以煎喇。

你睇，幾樣衰？哈哈！
最左下o個塊第一塊煎，預唔到個火同時間，好似燶左咁樣。
之後o個幾塊冇咁燶，但係 d 顏色唔均勻唔靚仔囉。
好彩都好味o者！
同場加影，手作網友自家製的雜莓果醬。

薄切手風琴薯仔

這個薄切手風琴傻仔，

如果講烹調上，毫無技巧可言。

技巧只係o係切傻仔。

有一日上網，見到人地整出黎張相好靚，

俾張相吸引左，就決定跟佢個食譜玩下喇。

材料：

薯仔、香草、牛油

步驟：

1. 切薯仔，但要小心唔好切斷。

　我係跟原食譜咁，用兩隻筷子打平夾住隻薯仔，

　等自己唔好切到落底的。

　先切中間一刀，再由中間向左右兩邊切。

2. 切好後，上面放一塊牛油，跟住放落焗爐，
　200 度焗 30 分鐘。拎出黎加 d 香草就食得喇！

後尾上網睇，原來呢隻傻仔係有名堂的。

佢叫做 Hasselback Potatoes，或 Accordion Potatoes，係瑞典菜，

1700年代時，一間o係斯德哥爾摩（Stockholm）叫 Hasselbacken 既餐廳既出品來的。

焗完出黎，外脆內軟。

而我見而家網上英文既食譜，

多數唔係上面放塊牛油，而係直接灑 olive oil 的。

"The preparation is what makes it seem like a fancy dish."

簡單的食材也可登上大雅之堂。