蒜蓉粉絲蒸蟶子

完全唔知自己點解咁大膽，竟然走去整海產類食物！？

但係屋企隔離間 Wellcome 其實好鬼吸引，

成日有 d 唔同種類既海產新鮮供應，

最重要係細細包，唔駛好似去街市咁買得少驚俾人啤。

同埋我鐘意行超市，名碼實價，唔駛下下問。

最近有見過蟶子、基圍蝦、不同種類既蟹、蜆...鮑魚都有呀！

今次就膽粗粗走去買左包蟶子，跟住好努力咁上網睇可以點整喇。

希望聽日唔好肚痾番唔到工啦XD

材料：

蟶子、粉絲（半包）、蔥、蒜蓉

步驟：

1. 準備所需材料。

　粉絲先用熱水浸軟，約三分鐘。

　蟶子要先洗乾淨，清洗方法我參考左淘大廚藝坊。

　首先用清水浸一浸佢地，跟住放落滾水灼到開口就可以拎起，

　再一次用清水洗乾淨佢身上面可能有既沙就得喇。

　（佢話呢 d 細隻叫黃肉蟶子，唔駛去內臟o個 d 野。

　　白肉即係大隻 o個 d，可以叫街市哥哥姐姐幫手清左內臟去。

　　但係我怕死，我每一隻都將佢身中間啡啡地色既野剪走先安心）

　同時，我亦 meet 走佢一邊既殼，方便陣間蒸。 

2. 其實係清洗時間長同煩 d，跟住既野就易喇！
　先將粉絲放底，上面排好 d 蟶子，跟住加埋蒜蓉、蔥花。
　再加多大約 80ml 既水，加蓋就可以開火喇。
　（我落既水比較多，諗住佢可以幫 d 粉絲吸多 d 蟶子水，好味 d，
　　整法其實就好似 blogger 鬼嫁所講既「炆焗」多過似「無水蒸」）
　我用呢個 LC 22cm buffet，中火 3 分鐘，慢火 10 分鐘，
　我怕死再焗多 3 分鐘，乜都熟啦！

3. 其實應該一開始落埋 d 金菇落去，一時唔記得左。
　結果快手淥熟包金菇撈埋落去，
　咁樣成鍋上枱就可以夠一餐喇！連飯都唔駛煮，方便快捷！
　粉絲吸晒 d 蟶子既精華，好好味，連鹽我都冇落就得喇。