豆腐火腩飯

尋晚既然整完燒腩仔又食唔晒，

第二日最好就要黎整豆腐火腩飯喇！

邊個話豆腐火腩飯係男人既專利，

只可以係男人既浪漫！？

呢碟火腩絕對有佢既故事

（因為係我第一次整既燒腩，哈哈！）

今次既食譜參考自 discuss forum，

但係我冇用炸豆腐，改用硬豆腐；

亦冇落大蒜同紅辣椒仔。

（自從返工以來，已經好少食辣野，少少都盡量避免）

材料：

火腩、硬豆腐

蔥少許、蒜頭兩粒、乾蔥頭一粒

蝦醬一茶匙、蠔酒一湯匙、生粉適量

步驟：

1. 準備所需材料，最後我只係用左半盒豆腐。

2. 豆腐切好，先煎到變金黃色。
　（我好似切得太細了，哈哈，好易煎爛）

3. 煎完吸一吸油，還好，冇碎晒。

4. 邊有人整豆腐火腩，火腩仲多過豆腐架？

5. 中途唔記得影相添！

　燒熱隻煎 pan，先落少少油，再落一茶匙蝦醬，落少少水，

　再落埋蔥、乾蔥、蒜頭（已切碎），炒香，

　然後落豆腐、燒肉，唔夠水就加少少咁啦，

　等佢收 d 水，然後再打個生粉芡，上碟！

　（太大碟了，睇黎又可以分兩三餐）

同場加影，香草炒大大燒烤菇菇。
近日變了青色控，對青 BB 的餐具有了莫名的喜愛。

脆皮燒腩肉

老老實實，複雜既野我係唔會整既。
之前睇親教整燒腩肉既食譜，都係類似呢個咁，
又要放過夜，又要出水，又要用針拮拮拮層皮，
睇完都冇興趣整。

但今次唔同，
只因我見到一個唔駛過夜又唔駛用針拮既食譜。
再加上 day camp 後的星期日，
我完全唔想做返工既野，
所以無無聊聊決定跟個食譜試下整喇！

材料：
五花腩一舊
（比較番街市同百佳買既腩肉，
　明顯梗係街市平d啦！
　但係百佳清豬毛真係清得好乾淨，
　貴得有原因）
幼鹽大量

醃料：
幼鹽、五香粉、酒適量
（原食譜係用幼鹽、南乳、紹酒，
　但係我既冇南乳又冇紹酒，
　爬文後發現用五香粉都得，所以改左。
　而紹酒就變左日本清酒，哈哈！）

步驟：

1. 將 d 醃料撈埋，然後查落肉身度（唔駛查塊皮）

2. 皮上面舖一層幼鹽，跟住成舊肉放番落雪櫃。

　記得唔需要包保鮮紙的。

　雪最少五個鐘，最好可以雪過夜。

　之前唔知睇邊個網頁話，o係雪既過程會抽乾皮既水份，

　咁樣焗出黎先會脆。

　（自己唔記得左影相，此圖出自這裡）

3. 雪完後，將舊肉拎出黎，用刀刮走d鹽，再用廚房紙巾抹走淨低既鹽。
　（唔好用水洗呀，整番濕層皮就唔脆喇！）
　跟住可以焗！分兩次用烤架焗：
　220度，放上面o個層，開上火，焗6-8分鐘
　（要望實舊肉，層皮變「芝麻皮」就得喇！）
　180度，放下面o個層，開上下火，焗一小時
　（原食譜係會o係最底放個烤盆，裝水，一黎可以方便之後清洗，
　　二來可以有 steam bake 感覺。但係因為我個焗爐太細，
　　只係得兩層，所以冇空間下面再放烤盆，好彩都唔係太難清潔）

4. 出爐放涼就可以切得喇！

最後，當然係好成功啦！出街買都未試過層皮咁脆呀！

完全唔駛用針拮都咁脆，o岩晒我呢d懶人！

日式叉燒拉麵

跟 blogger Glora DIY 的 recipe 做的日式叉燒，

雖然傻傻地唔知點解睇錯野落早左糖，

但好彩都冇佢話既苦味，

食落都好似平時出街食o個隻味咁。

不過我估可以浸耐多少少，可以再淋 d。

材料：

五花腩一舊

（去百佳買，叫佢即刻切的，咁就闊身ｄ好整ｄ）

甘筍（一條，切條）

洋蔥（半個，切條）

蒜頭（五粒）

蔥（一棵，切段）

料理酒、味醂、醬油（各 185 ml）

（其實只係因為我個量杯仔係 185 ml）

糖 30 g

步驟：

1. 用綿繩紮實舊五花腩

　（由於屋企冇粗身綿繩，我用左平時 d 白色線）

2. 將所有材料切好

3. 慢火煎香五花腩（約五分鐘）

4. 原食譜係分開一樣樣落，次序係洋蔥、甘筍、蒜頭、蔥。

　但我好懶，一樣過落晒頭三樣，最後落蔥。炒勻至軟身。

5. 準備好醬料

　（味醂之前o係 jusco 買，料理酒 o係 living plaza 買）

6. 可以加埋d醬料落去喇！大概八成滿。

　中慢火煮 15 分鐘，之後再焗 30 分鐘。

　中途要反轉舊肉，如果唔係就一邊太咸一邊唔入味。

　焗完後再慢火煲番滾，落糖（30g左右），煮五分鐘就搞掂。

　（但係我一時傻左，落醬料o個陣一次過落埋糖，

　不過我都唔覺有咩苦味，我估下次我都係會一次過落埋喇，哈哈！）

好喇，煮埋個 759 買既日式拉麵就可以開餐喇！

睇落都呃得下人丫哈哈！

原食譜話，如果食唔晒可以連汁放落冰格，

可以放 7-10 日。我而家放左 d 落冰格喇！