窩蛋牛肉煲仔飯

基本上，這個煲仔飯的煮法，是完完全全跟鬼嫁的食譜。
鬼嫁的 blog 既食譜真係好正！

材料：
米、水各一杯
牛肉片
蛋

步驟：
1. 浸米半小時（冇時間可以唔做，而我都冇做XD）
2. 牛肉加少許鹽麴
3. 加米加水（基本上比例係 1:1）
4. 開爐，中火加熱 2 分鐘，途中不停用筷子攪，避免痴底
5. 中火加蓋煮 2 分鐘
6. 小火加蓋煮 8 分鐘
7. 開蓋，加肉，加蛋
　（其實人地正途係咪就咁成隻生蛋咁食既時候先落架？但我驚驚地）
　開番中火 30 秒加熱番個煲，
　跟住小火煮 5 分鐘
8. 熄火，焗 10 分鐘，食得！

煲仔飯豉油：
豉油三湯匙、味醂兩湯匙、糖兩茶匙
全部放晒落微波爐加熱一分鐘搞掂～

蘋果雪梨瘦肉湯

因為整水果酵素用淨左 d 蘋果雪梨，

最好就係要黎煲湯喇～

蘋果雪梨瘦肉湯係秋天最好既湯水，

夠晒滋潤～

不過我大頭蝦唔記得落埋雪耳，

如果唔係仲潤呀！

材料：

瘦肉、蘋果一隻、雪梨兩隻

（下次要加埋雪耳！）

步驟：

1. （有雪耳就要浸左雪耳先，

　　跟住剪左黃色根部）

　將瘦肉「飛一飛」水

2. 切細生果

3. 將所有野放晒落水，中火煲佢半個鐘

4. 轉細火繼續煲佢半個鐘

5. 加鹽，飲得。

蜂蜜梅子酒

上年因為睇左肥丁既網頁，

學識左整梅子酒。

釀了七個月的蜂蜜梅子酒，

今日因為我想要個玻璃樽，

俾我開左封喇哈哈！

我用左 1:1 既凍水黎開黎飲，

仍然係好香既梅子味，

只係有少少既酒精味，O岩晒我！

下面張相就係當初啱啱釀既樣，

釀下釀下 D 梅子就會自己出水架喇～

但係其實每樽到最後都只係得少於半樽既收成。

下年可以釀多少少喇！

水果酵素初體驗

一直都好想試整酵素，見網頁既介紹講到佢好似好神奇咁，

每日飲少少就可以令身體健康，

可以幫助排毒、促進身陳代謝、改善體質、增加抵抗力等等，

（唔同既水果又有唔同既功效咁...）

總之感覺上能醫百病咁啦！

終於，今次「的」起心肝，終於去買材料試下整喇。

希望兩星期後成功啦～

材料：
心目中想要既水果
檸檬
糖（黃糖、冰糖、黑糖、紅糖也可，但不建議用白糖）
糖係各種水果既重量既 50% 左右
如果用比較甜味重既水果（例如提子），可以用 35%
基本上 35% - 60% 都可以的

今次整左三款：
1. 蘋果雪梨+冰糖　2. 火龍果香蕉+蔗糖　3. 薑+黑糖

步驟：
1. 將玻璃樽消毒
　先用熱水淥兩三分鐘，再用風筒吹乾

2. 材料洗乾淨，風乾（一定要乾，如果唔係會發霉架）
　去皮、切片

3. 最底先放水果，再放檸檬，再放一層糖
　咁樣一層層咁放到樽口。
　最上面既一層一定要係糖，可以厚少少。
　用保鮮紙封口，蓋好，放陰暗地方就可以了。
　水果酵素兩個星期可以開封，
　黑糖薑就要放一個月。
　開封後隔渣，就可以放雪櫃喇！

整好之後，每次飲 30ml，可以開水飲（但唔可以熱水，會破壞酵素）

每日飲兩至三次。

不過，整好先講啦XD

斜揹貓貓口金包

在網上認識了一班喜愛手作的朋友，

每次我們也一起在淘寶訂一些材料包，

找個下午約出來，

一起交換禮物，一起做手作。

這次的主題是布袋，

而我選了的是這款口金包。

我想我已經最少三年沒有做過口金包吧...

之前曾經做了幾十個放到手作市集擺賣，

之後因為一些原因而沒有再賣、貨品也沒有取回。

今次再做，手藝生疏了，

上口金上得不太好，

不過，還好，終於找回耐性完成一個口金包。

步驟：

1. 原材料包唔係用呢兩款布的，

　我自己換番隻靚靚貓貓布。

　其實呢款我訂o個陣已經知唔太覆雜，

　因為我都驚自己冇左以前既耐性去完成。

2. 將舖綿熨落面布，跟住面對面咁對摺，

　縫左右兩邊既直線位。

　（上面既彎位唔駛縫）

3. 因為想個底有少少厚度，

　所以o係個袋底摺個三角位，o係約 1 cm 位置縫合，

　跟住可以剪左隻角，不過唔好剪太貼線位，會爛。

4. 裡布都係同面布一樣，面對面咁縫兩邊直線位。

　跟住將裡布既面，套落個面布度。

　（應該會係裡布既面對住面布既面）

5. 將彎位縫合，留番約 5 cm 黎反番個面出黎。

　反完後熨平 d 邊位，埋口，跟住可以上口金。

　上口金前可以用 d 大頭針固定左個位先，

　由中間位開始固定。

6. 完成。
　雖然手工不太精美，但總算完成了。

洛神花果醬

媽媽種了靚靚的洛神花，

專登留左 d 俾我要黎整洛神花果醬，

仲要連材料都準備好晒！

當然要即刻試整啦～

整完真係覺得好簡單，

最重要又好食喎，哈哈！

其實我好鐘意洛神花沖水既味，

酸酸地咁，好開胃～

試整之前，睇下洛神花既真身有幾靚啦！

但係當佢地跌左落地下，就變左咁...

打開好樣衰既殘花，就會有呢粒洛神花喇。

新鮮o個陣隻色紅 d 架！

放得耐左就越黎越深紅。

材料：

洛神花適量（呢度有 33 粒）

片糖適量（呢度有 100g）

（媽媽說片糖比白糖健康，否則用黃糖也可）

已消毒的玻璃樽仔

步驟：

1. 整碎片糖（用較剪剪就得喇）

2. 將洛神花既核拎出黎，先將佢既底切左

3. 然後就可以用筷子推中間粒核出黎
　（其實可以就咁 meet 開 d 花瓣，
　　但我見佢咁靚唔捨得咁快 meet 爛佢）

4. d 核好似有粒花咁大咁，
　咁就冇用好似好浪費咁

5. 洗乾淨

6. 剪碎

7. 加半碗水，用慢火慢慢煮，一路煮要一路攪，
　等佢唔好痴底

8. 佢會越黎越杰的，因為洛神花有天然既果膠，

　所以唔駛加其他果膠都整到果醬。

　見到佢杰身左就可以落埋 d 片糖，

　一路繼續攪等佢溶。

    

9. 入樽，搞掂！

薄底PIZZA

基本上，今次 pizza 既做法係完全採用肥丁既食譜。

都係o個句啦，難既野我唔整的。

就係佢個食譜o個句話「無需等發酵」吸引左我。

加上我又有個 LC 22cm buffet 可以放到入爐，

所以更加要試下啦！

材料：

麵糰（麵糰食譜同「肥丁」的完全冇分別）

高筋麵粉 250g、酵母 5g、鹽 3g、糖 7g、

橄欖油 1湯匙（明顯我係冇橄欖油既，所以我用左普通粟米油）

暖水 140g（肥丁話約 40 度，我就大概覺得隻手指放到落水既暖度就算喇）

餡料：

白磨菇半隻、啡磨菇半隻、蕃茄仔五粒、
香草腸一條、莎樂美腸四小片、黃椒 1/3 個
蕃茄醬適量、Mozzarella cheese 一舊、Parmesan cheese 適量

步驟：

1. 準備好各餡料

2. 切好，並用廚房紙巾吸乾水
　（肥丁話如果唔夠乾，焗出黎就冇咁脆喇）

3. 準備暖水，將糖同酵母放落暖水攪勻

4. 跟住再放麵粉、鹽同油，先攪攪後搓搓

5. 搓到光滑靚靚

6. 分三份，每次煮一個 pizza 要一份就夠喇。
　另外兩份可以包好放雪櫃，肥丁話可以保存一個月。

7. 預熱焗爐 240 度。
　碌好餅底，鍋底掃油，放落去，整形

8. 塗上蕃茄醬

9. 隨心加上材料

10. Mozzarella 芝士切薄片，舖上；
　  之後再灑上 Parmesan cheese。

11. 放入焗爐，焗 6 分鐘就食得喇！

其實到最後焗出黎，冇想像中咁脆。
可能因為我整得唔夠薄，
同埋蕃茄醬比較濕（我冇慢火炒佢令佢乾 d 水）。
不過反而有少少厚批既質感，都唔錯。
見佢網頁話有網友試過用呢個食譜，
發酵一個鐘後再整厚批同芝心批都得，
又等我下次試下先！